Felix Bolaños Presidentetza, Justizia eta Gorteekiko Harremanetako ministroak Prozedura Kriminalaren Lege Organikoaren (LOECrim) proiektuari buruzko I. eztabaida jardunaldia inauguratu du asteazken honetan, Ikerketa Politiko eta Konstituzionalen Zentroak (CEPC) antolatuta.
Joan den urrian, Ministroen Kontseiluak LOECrim berria onartu zuen, zigor arloko prozedura arautzen duena eta delituak ikertu eta epaitzeko arauak eta bermeak zehazten dituena, eta Kongresura bidali zuen, Parlamentuan izapidetzeko.
Bolañosek gaur defendatu duenez, lege eraldatzaile eta historikoaren proiektua da, egungo Prozedura Kriminalaren Legea 1882an onartu zelako. Berrikuntza nagusia, ministroak azaldu duenez, ikerketa penalaren ardura Fiskaltzari esleitzean datza, Europar Batasuneko herrialde gehienetan gertatzen den bezala.
Bolañosek nabarmendu du azken hamarkadetako eragile juridiko guztien adostasuna lortu duen proiektua dela, joera politiko guztietako Justizia ministro ohiak aurretik bultzatzen saiatu direna.
Justiziaren eraldaketarik handiena
Ministroak LOECrim berria Ministerioa Justiziari ematen ari den bultzada erreformistaren barruan kokatu du. Ildo horretan, Karrera Judiziala eta Fiskala handitu eta indartzeko Lege Organikoaren proiektua aipatu du, Parlamentuan izapidetzen ari dena, eta Justizia Zerbitzu Publikoaren Efizientziari buruzko Lege Organikoa ere, 2025eko urtarrilean indarrean sartu zena.
Haiek guztiak zerbitzu publikoaren egiturazko erreforma proiektu baten parte direla adierazi du, hamarkadetan Justiziaren eraldaketarik handiena ekarriko duena, sen onari, eraginkortasunari eta interes orokorrari erantzunda.
