Lege proiektuak aukera ematen du sare sozialetako erabiltzaile nabarmenei informazioa zuzentzeko eskatzeko, eta, horretarako, mekanismo ikusgai bat ezartzera behartzen ditu.
Madrilen, 2026ko urtarrilaren 13an. Gobernuak gaur Ministroen Kontseiluan behin betiko onartu du Zuzentzeko Eskubidea Arautzen duen Lege Organikoaren Proiektua. Arau horrek komunikabideen errealitate berrietarako eta herritarrek informazioa lortzeko bideetarako eguneratzen du eskubide hori, eta, beraz, egungo legedia ordezkatuko du, 1984koa.
Felix Bolaños Presidentetza, Justizia eta Gorteekiko Harremanetarako ministroak azaldu duenez, zuzentzeko eskubideak funtsezko funtzioa betetzen du oinarrizko eskubide batzuen tutoretzan —ohorerako eskubidea edo egiazko informazioa libreki komunikatzeko eta jasotzeko eskubidea—, kalte eragiten duten informazio zehaztugabeak zuzentzen eta eztabaida publikoaren kalitatea hobetzen laguntzen baitu, fake news-en ugaritzeak kaltetua baitago.
Sare sozialen erabiltzai2le nabarmenak, zuzentzera behartuak
Lege proiektuak funtsezko berrikuntzak sartzen ditu zuzenketaren xede izan daitezkeen horiei dagokienez. Hedabide tradizional zein digitalez gain, onlineko plataformen erabiltzaileei ere eskatu ahal izango zaie argitaratutako informazioa zuzentzeko. Legeak, haien jarraitzaile kopuruagatik, erabiltzaile “nabarmentasun bereziko“ deitzen dituenei (influencer direlakoei) aplikatuko zaie —plataforma bakar batean 100.000 jarraitzaile dituztenei, edo 200.000, hainbatetan metatuta—.
Horretarako, hedabide digitalek eta plataformen erabiltzaileek mekanismo eskuragarri eta ikusgarri bat ezarri beharko dute, zuzenketa eskaera erraz bidaltzeko aukera emango duena. Gainera, sare sozialetan argitaratutako informazioen kasuan, zuzenketaren xede den jatorrizko informazioan jakinarazpen bat jaso beharko dute argituz zuzendua izan dela.
Zuzentzeko eskubidea baliatu ahal izango dute adingabeek
Hedabide digitaletan, zuzentzen den jatorrizko informazioaren antzeko nabarmentasuna duen esteka berri baten bidez egin beharko da zuzenketa. Informazioa hainbat hedabidetan argitaratu bada, guztietan zuzendu beharko da. Eta onlineko plataformen kasuan, zuzenketa lehen informazioarekin batera argitaratu beharko da, ikusgai dagoen leku batean.
Era berean, arau berri honekin, adingabeek beren kabuz baliatu ahal izango dute zuzentzeko eskubidea, heldutasun baldintzek horretarako aukera ematen badute. Hala badagokio, 16 urtetik gorakoek egin ahal izango dute beti. Gainera, hildako bati eragiten dioten informazioa zuzentzeko eskatu ahal izango duten pertsonen kopurua handitu egiten da, eta, horri esker, aurrekoek, ondorengoek, anai-arrebek, ezkontideek edo bikotekideek edo berariaz izendatuak izan direnek egin ahal izango dute.
Zuzentzeko eskubidea baliatzeko epeari dagokionez, 10 egun naturalekoa izango da informazioa hedabide tradizionaletan argitaratu bada, eta 20 egunekoa hedabide digitalen edo plataforma digitalen kasuetan.
Demokraziaren aldeko Ekintza Planean aurrera eginez
Azkenik, legeak erraztu egiten du prozedura judiziala, zeinetara jo baitezakete zuzenketa ukatzen zaien herritarrek, bizkortasun handiagoa eta ingurune digitaletara egokitzea bermatze aldera.
Lege proiektu hau onartuta, Ministroen Kontseiluak 2024ko irailean onartutako Demokraziaren aldeko Ekintza Planaren beste neurri bat betetzen da, zehazki 2.4.2 neurria.
