Hitzarmenaren bidez, Ministerioak hainbat irtenbide teknologiko lagako dizkio Generalitateko Gobernuari, eta horrek transferitutako Justiziaren eskumena duten autonomia erkidegoekin lankidetza digitalaren eredua sendotuko du.
Madrilen, 2026ko martxoaren 24an. Presidentetza, Justizia eta Gorteekiko Harremanetarako Ministerioak eta Kataluniako Generalitateko Gobernuak hitzarmena sinatu dute gaur, Justizia Zerbitzu Publikoaren digitalizazioaren arloko lankidetza indartzeko.
Manuel Olmedo Justiziako Estatu idazkariak eta Ramon Espadaler Generalitateko Justizia eta Kalitate Demokratikoko kontseilariak sinatutako hitzarmenak Ministerioak Kataluniari doan lagatzen dizkion baliabide teknologikoak arautzen ditu, eta Estatuko Administrazio Orokorrak garatutako tresna berriak hartzea errazten du.
XXI. mendeko Justizia –arinagoa, eraginkorragoa eta lehendik dauden baliabide publikoak aprobetxatzea ahalbidetuko duen arkitektura teknologiko komuna duena– bermatzeko Ministerioa bultzatzen ari den modernizazio eta eraldaketa prozesuaren barruan kokatzen da hitzarmena. Bere sinadurarekin, Kataluniak bat egin du Ministerioak bultzatzen duen eredu teknologikoarekin, Asturiasko Printzerriak, Kanariar Uharteek, Errioxak, Galiziak, Euskadik eta Nafarroak egin duten bezala.
Justizia arinagoa eta digitala lortzeko arkitektura komuna
Hitzarmenak zehazten duenez, Kataluniako Gobernuak Ministerioaren garapenak erabili ahal izango ditu, hala nola Justizia Karpeta, onlineko plataforma digitala ebazpenak kontsultatzeko, espediente judizialen egoera egiaztatzeko, ziurtagiriak deskargatzeko, Erregistro Zibiletan eta organo judizialetan aldez aurreko hitzordua eskatzeko, etab.
Ministerioak, besteak beste, LexNet, auzitegien eta operadore juridikoen arteko komunikazio elektronikorako tresna; DICIREG, Erregistro Zibilaren espedienteak online izapidetzeko aukera ematen duen plataforma; edo Interoperabilitate Hub-a, organo judizialen artean espediente judizial elektronikoak bidaltzea errazten duena, partekatuko ditu.
Era berean, robotizazioari edo adimen artifizialari esker prozesuak arintzeko aplikazioak ere partekatuko dira. Ministerioak tresna horiek guztiak euskarri teknikoarekin, segurtasun bermeekin eta dokumentazio funtzional osoarekin transferituko ditu.
Lankidetza eredu honek autonomia erkidegoek garapenak egokitu eta beren ekarpenekin aberastea ahalbidetzen du, modu horretan arlo judizialean berrikuntza publikoko ekosistema partekatua sustatuta.
