Crearase un sistema mixto Igrexa-Estado, con participación das vítimas, para os casos en que xa non é posible a vía xudicial. A Igrexa farase cargo da reparación.
O Goberno e a Igrexa católica alcanzaron un acordo para a reparación integral das vítimas de abusos sexuais producidos no seo da Igrexa para as que xa non é posible a vía xudicial porque os feitos prescribiron ou os seus autores faleceron. Así mesmo, crearase un sistema mixto Igrexa-Estado, con participación das vítimas e reparacións económicas ou de calquera outra natureza a cargo da Igrexa. O Defensor do Pobo será a institución encargada de elaborar as propostas de recoñecemento e reparación.
O acordo rubricárono este xoves o ministro da Presidencia, Xustiza e Relacións coas Cortes, Félix Bolaños, o presidente da Conferencia Episcopal Española (CEE), Luis Argüello, e o presidente da Conferencia Española de Relixiosos (Confer), Jesús Díaz Sariego, no Palacio de Parcent, sede do Ministerio.
«Despois de décadas de silencio e encubrimento, após atoparse cun muro, hoxe podemos dicir que a democracia española cumpre coas vítimas de abusos», destacou o ministro.
No prazo dun mes asinarase un convenio de colaboración entre a CEE, a Confer, o Defensor do Pobo e o Ministerio co que se formalizarán os termos acordados hoxe.
O novo mecanismo de reparación prevé que a vítima inicie o proceso perante unha unidade de tramitación do Ministerio da Presidencia, Xustiza e Relacións coas Cortes (UT), que disporá dos medios e recursos necesarios para o seu funcionamento. Será a encargada de recibir solicitudes, da comunicación entre as partes ou notificar as propostas.
Se non hai conformidade, decide o Defensor do Pobo
Esta unidade trasladará o caso á Unidade de Vítimas do Defensor do Pobo (UVDP), que fará unha revisión individualizada de cada petición tras a que realizará unha proposta de resolución e, de ser o caso, de reparación —simbólica, restaurativa, espiritual e/ou económica—, atendendo ao que solicite a vítima.
A proposta trasladarase á comisión asesora da Igrexa prevista no seu Plan de Reparación Integral a Vítimas de Abuso (CPRIVA), que a avaliará e emitirá un informe. Se hai conformidade das partes (CPRIVA e vítima), a proposta terá carácter definitivo. Se houbese desconformidade dalgunha das partes coa proposta, convocarase unha Comisión Mixta, sempre con participación das asociacións de vítimas, que deliberará para alcanzar un acordo unánime. Se continuase a desconformidade, corresponderá á Unidade de Vítimas do Defensor do Pobo adoptar a resolución definitiva.
Un ano, prorrogable outro máis, para solicitar a reparación
As vítimas terán un ano, prorrogable outro máis, para presentar as solicitudes de reparación. Este prazo comezará a computar desde a sinatura do convenio. Ademais, o Ministerio promoverá as modificacións precisas para aplicar exencións fiscais ás reparacións que se recoñezan ás vítimas.
O acordo alcanzado establece que a Igrexa católica deberá dar cumprimento ás medidas reparadoras en prazo. Se non o fixesen, a diocese, o instituto ou entidade relixiosa responsable, a CEE e a Confer garantirán o seu cumprimento.
Recoñecemento ás asociacións de vítimas
O ministro agradeceu ás asociacións de vítimas, e ás propias vítimas, a súa loita incansable durante décadas por alcanzar unha reparación xusta.
En abril de 2024, o Goberno aprobou o Plan para implementar o Informe do Defensor do Pobo sobre abusos sexuais na Igrexa católica. Desde entón traballouse e negociouse coa Igrexa a creación dun sistema de reparación para as vítimas que xa non poden acudir á vía xudicial. Con este acordo cúmprese coas recomendacións do Defensor do Pobo e co compromiso de recoñecemento e reparación do Goberno coas vítimas.
