O ministro destacou os
avances consolidados no que define como «a maior transformación da Xustiza en décadas"
O ministro da Presidencia, Xustiza e Relacións coas Cortes, Félix Bolaños, participou este venres na clausura da 39.ª Asemblea da Asociación Xudicial Francisco de Vitoria (AJFV), celebrada na Coruña. Durante a xornada, a asociación elixiu a súa nova voceira, María Enma Ortega, a quen Bolaños felicitou polo nomeamento.
Na súa intervención, Bolaños lembrou as reformas do servizo público de Xustiza postas en marcha polo Goberno e pediu un diálogo respectuoso, informado e construtivo para xerar e consolidar consensos ao redor delas.
Bolaños reivindicou así esta lexislatura como «a maior transformación da xustiza en décadas» e subliñou que xa se materializou a metade da ambiciosa axenda lexislativa prevista para a Xustiza.
Reformas da Xustiza xa consolidadas
Entre os avances consolidados, destacou o Real decreto lei 6/2023, un fito na dixitalización do sistema, e a Lei de eficiencia da Xustiza, que transforma e moderniza unha planta xudicial do século XIX e cuxa implementación terminará o próximo 31 de decembro.
O ministro tamén destacou dúas reformas esenciais pendentes de aprobación definitiva. En primeiro lugar, a Lei orgánica para a ampliación e fortalecemento das Carreiras Xudicial e Fiscal, que supoñerá a maior ampliación da planta xudicial da historia con preto de 2500 novas prazas de xuíces e fiscais nos próximos tres anos.
Ademais, Bolaños tamén se referiu á futura Lei orgánica de axuizamento criminal —enviada recentemente ao Congreso—, que modernizará o noso sistema penal, con maiores garantías para todos os intervenientes. Unha reforma que, tal e como asegurou, non supón ningún risco de politización.
O ministro reafirma así a súa intención de defender as reformas da Xustiza nos principais foros xudiciais. Recentemente, participou tamén no 39.º Congreso de Xuízas e Xuíces para a Democracia, así como no XXI Congreso do Foro Xudicial Independente.
