O ministro da Presidencia, Xustiza e Relacións coas Cortes, Félix Bolaños, participou este mércores nunha charla-debate organizada polo Colexio Maior César Carlos, en Madrid. Nel residen estudantes posgraduados vinculados á investigación ou á preparación de oposicións á función pública nos corpos superiores da Administración.
Trátase, ademais, dunha institución que este ano cumpre oito décadas de historia e á que Bolaños felicitou por consolidarse como un espazo de cultura e excelencia, onde se formaron moitos dos mellores servidores públicos do noso país.
Durante a súa intervención, Bolaños explicou as reformas da Xustiza aos colexiais e destacou a modernización integral Aa administración a través do Real decreto-lei 5/2023, centrado na eficiencia procesual; o Real decreto-lei 6/2023, con reformas en materia de eficiencia dixital como o Expediente Xudicial Electrónico; e a Lei de eficiencia —cuxa implantación termina o próximo 31 de decembro—, que actualiza a planta xudicial.
Ademais, o ministro subliñou que se segue traballando para sacar adiante a nova Lei orgánica de axuizamento criminal e a Lei para a ampliación e fortalecemento das carreiras xudicial e fiscal, ambas paralizadas durante anos e que o Goberno enviou xa ao Parlamento para a súa tramitación.
Modernizar mantendo a esixencia
Bolaños explicou que a lei de reforzo das carreiras supón unha grande oportunidade para o Servizo Público de Xustiza e tamén para os opositores, xa que crea 2500 prazas novas de xuíces e fiscais.
Ademais, o ministro explicou que non só se modernizará o proceso mantendo a esixencia, senón que se fortalece a confianza en que o mérito e a capacidade son os únicos criterios determinantes. Entre os principais cambios, dixo, están a incorporación dunha proba escrita —que permita avaliar habilidades imprescindibles para o labor xurisdicional e que van máis aló do memorístico—, así como a obrigación de gravar integramente os exames orais para garantir o dereito á revisión dos opositores.
Igualmente, puxo en valor as bolsas SERÉ para preparar oposicións a xuíz, fiscal, avogado do Estado ou letrado da Administración de Xustiza. Unha aposta decidida pola igualdade de oportunidades para que acceder aos corpos máis altos do Estado non dependa dos recursos familiares, senón do esforzo, a vocación e a preparación de cada persoa, afirmou.
Bolaños asegurou que as reformas impulsadas polo Goberno buscan manter a meritocracia como principio esencial, pero tamén garantir que ninguén quede fóra por razóns económicas ou sociais. «A igualdade de oportunidades non é un luxo: é unha esixencia democrática», defendeu o ministro.
Tras a súa intervención, o ministro participou nun debate cos estudantes do Colexio Maior.
