O Consello de Ministros iniciou hoxe o proceso para nomear a Teresa Peramato Martín nova fiscal xeral do Estado
O Consello de Ministros iniciou hoxe o proceso para nomear a Teresa Peramato Martín nova fiscal xeral do Estado a proposta do ministro da Presidencia, Xustiza e Relacións coas Cortes.
Peramato é fiscal de carreira con 35 anos de exercicio e ten o recoñecemento unánime dos operadores xurídicos. Posúe unha ampla traxectoria, especialmente na loita contra a violencia de xénero. De feito, é considerada unha das grandes impulsoras da especialización xudicial nesta materia. Actualmente é fiscal de sala xefa da Sección Penal da Fiscalía do Tribunal Supremo e fiscal de sala delegada para a Protección e Tutela das Vítimas no Proceso Penal.
Teresa Peramato ingresou na carreira fiscal en 1990. Tras o seu paso por diversas Fiscalías (Tenerife, Valladolid e Barcelona), trasladouse á Fiscalía Provincial de Madrid, destino en que, en 2005, foi nomeada fiscal delegada para a Sección de Violencia sobre a Muller. Tamén foi membro do grupo de expertos do Observatorio Estatal de Violencia contra a Muller para a elaboración do primeiro informe anual deste organismo en 2007.
En 2018 pasou a ocupar o cargo de fiscal adscrita á Fiscalía ante o Tribunal Constitucional. E en maio de 2021 foi nomeada fiscal de sala contra a Violencia sobre a Muller, cargo que ocupou ata xaneiro de 2025.
Tras o Consello de Ministros, o ministro da Presidencia, Xustiza e Relacións coas Cortes, Félix Bolaños, destacou que precisamente hoxe, Día Internacional para a Eliminación da Violencia contra a Muller, o Goberno propoña unha persoa cun compromiso feminista indiscutible para que se faga cargo da Fiscalía Xeral do Estado. Unha persoa —engadiu— absolutamente idónea para levar a cabo os retos do Ministerio Fiscal e continuar reforzando a súa autonomía e prestixio.
Tal e como prevé o Estatuto Orgánico do Ministerio Fiscal, a nova fiscal xeral do Estado será nomeada polo rei, por proposta do Goberno, ouvido previamente o Consello Xeral do Poder Xudicial. Unha vez recibido o informe do CXPX, o Goberno comunicará a súa proposta ao Congreso dos Deputados para que compareza ante a Comisión de Xustiza e se poidan valorar os seus méritos e idoneidade.
Tras o seu nomeamento definitivo, a fiscal xeral do Estado xurará ou prometerá o cargo ante o Rei e tomará posesión do mesmo ante o Pleno do Tribunal Supremo.
