O ministro da Presidencia, Xustiza e Relacións coas Cortes, Félix Bolaños, reuniuse hoxe co presidente da Axencia da UE para a Cooperación Xudicial Penal (Eurojust), Michael Schmid, na Haia (Países Baixos). O encontro centrouse na cooperación xudicial entre Estados e as vías para potenciar o papel deste organismo, que coordina a loita das autoridades xudiciais nacionais contra a delincuencia transfronteiriza grave e organizada en Europa e terceiros países.
Bolaños reiterou o firme compromiso de España con Eurojust e a vontade de seguir impulsando a cooperación xudicial na Unión Europea. Tamén destacou o papel de liderado do noso país para fortalecer a cooperación xudicial con terceiros países, especialmente cos latinoamericanos.
Ademais de Bolaños e Schmid, participaron no encontro, entre outros, o vicepresidente de Eurojust e membro nacional por España, José de la Mata, e a directora xeral de Cooperación Xurídica Internacional e Dereitos Humanos, Eva Pérez.
Tras a reunión, o ministro mantivo un breve encontro coa comunidade española que traballa en Eurojust no que repasou algunhas das reformas emprendidas para modernizar a xustiza española. Entre elas, a dixitalización do sistema para axilizar todos os procedementos.
Visita a Europol
Durante a súa xornada de traballo na Haia, o ministro Bolaños tamén se reuniu con Catherine de Bolle, directora executiva de Europol, a axencia da UE cuxa función principal é axudar as autoridades policiais e xudiciais dos países membros a combateren a delincuencia internacional e o terrorismo.
No encontro, o ministro destacou a importancia de reforzar a coordinación entre Eurojust e Europol e afrontar retos comúns como a adaptación a unha contorna tecnolóxica en rápida evolución, a protección e o acceso aos datos, e a cooperación con terceiros países.
