O ministro da Presidencia, Xustiza e Relacións coas Cortes, Félix Bolaños, compareceu hoxe na Comisión de Xustiza do Senado. Na súa intervención, reiterou a aposta do Goberno polas reformas da Xustiza, unha oportunidade histórica para convertela nun servizo público do século XXI —sinalou—- fronte ás posicións inmobilistas da oposición, que prefire permanecer no pasado «cosendo cartafois» en lugar de modernizala.
O ministro presentou en detalle o proxecto de Lei Orgánica de Axuizamento Criminal (LOECrim) e fixo balance da súa ambiciosa axenda normativa, que considera cumprida nun 50 % con fitos como a renovación do Consello Xeral do Poder Xudicial, a dixitalización da Xustiza ou a Lei de eficiencia, que moderniza unha planta xudicial deseñada no século XIX.
Sobre as reformas pendentes, anunciou que nos primeiros meses de 2026 se aprobará a Lei de asistencia xurídica gratuíta, coa que se completará a maior transformación da Xustiza en décadas. Tamén reiterou que seguirá traballando para sacar adiante dúas leis en tramitación: a nova LOECrim e a Lei orgánica para a ampliación e fortalecemento das Carreiras Xudicial e Fiscal, que mellora as condicións laborais deste colectivo e permitirá incorporar 2500 xuíces e fiscais en tres anos.
Bolaños tamén se referiu a outras cuestións de actualidade en resposta ás peticións de comparecencia de diversos grupos parlamentarios. Sobre a loita contra a corrupción, lembrou que o Goberno demostrou tolerancia cero, tomou medidas de forma inmediata e impulsou iniciativas de calado como o Plan Estatal de Loita contra a Corrupción. Tamén destacou que o GRECO (Grupo de Estados contra a Corrupción), na súa última avaliación, constata que España xa cumpre parcialmente 16 das súas 19 recomendacións (84 %).
En canto a outra das cuestións polas que se solicitou a súa comparecencia, o procesamento do Fiscal Xeral do Estado, o ministro reiterou que o Goberno acata o veredicto, pero discrepa del con total respecto. Tamén asegurou que sería unha boa noticia coñecer canto antes o texto da sentenza.
Un novo sistema penal máis moderno e garantista
Na súa presentación do proxecto de Lei orgánica de axuizamento criminal, o ministro destacou que, tras 143 anos, o proxecto moderniza o proceso penal e atribúe a investigación ao Ministerio Fiscal baixo a supervisión dun xuíz de garantías. Un proxecto —lembrou— que bebe de textos anteriores de ministros como Rafael Catalá ou Alberto Ruiz-Gallardón e que ten como orixe o Pacto de Estado pola Xustiza de 2001.
O ministro asegurou que establece un modelo máis garantista, nos homologa aos países da nosa contorna europea e é máis respectuoso coas disposicións constitucionais que atribúen aos xuíces a función de administraren xustiza e aos fiscais a de promoveren a súa acción.
Así mesmo, destacou que o proxecto inclúe unha reforma do Estatuto Orgánico do Ministerio Fiscal que reforza a súa autonomía con medidas como desvincular a duración do mandato do Fiscal Xeral do Estado do Goberno.
